ஓரினச் சேர்க்கை

இன்றைக்கு 2 பதிவுகள் படித்தேன். தோழியரில் ஒன்று. மற்றது பொடிச்சியினது. உடனடியாக மனம் "ஓரினச் சேர்க்கையாளர்" பற்றிய அறிமுகம் எனக்கு எப்ப ஏற்பட்டது என்பதை யோசித்தது. சரியாக குறிப்பிட முடியவில்லை. இலங்கையில் இருந்த போது எனக்கு இவை பற்றி தெரிந்திருந்திருக்கக் கூடும். ஞாபகமில்லை. ஒரு த.சே.வின் அறிமுகம் ஏற்பட்டது சிட்னியில் கல்லூரியில் தான். ஒரு பெண். அவவின் பாலியல் தெரிவு அவவின் சுதந்திரம் என்பதே என் கருத்தாக இருந்தது/ இருக்கிறது. ஒரு conservertive குடும்பத்திலிருந்து வந்த எனக்கு எப்படி இந்தக் கருத்து முதலிருந்தே மனதில் ஒரு விதமான குழப்பமும் இல்லாமல் தோன்றிற்று / வேரூன்றியது என்று எனக்கு ஆச்சரியமாக இருக்கிறது. சந்தோஷமாகவும் இருக்கிறது. இவர்களின் சேர்க்கைத் தெரிவு சரியானதா இல்லையா என்பதைப் பற்றி ஒரு தனிப்பட்ட கருத்து எனக்கு இல்லை. ஒரு விஷயத்தில் தனிப்பட்ட கருத்து இல்லாதிருத்தல் சாத்தியமா என்பது பற்றிப் பிறகு பார்க்கலாம். ஆனாலும் ஒரு சக மாணவியாக அவவின் பேச்சும் நடவடிக்கைகளும்(5 வார்த்தையில் ஒன்று "f***", பெண் தோழியுடனான உறவு பற்றிய விளக்கங்கள்) என்னால் சகிக்கக் கூடியதானவையாக இருந்ததில்லை. அதற்காக எப்பவும் அவவோடு அளவாகவே வைத்துக் கொள்வேன். அவள் தவறாக எடுத்துக் கொள்வதில்லை என்பது பெரிய ஆறுதல். ஆனால் வகுப்பின் வழமையான பகிடி சேட்டைகளில் சேர்ந்து முஸ்பாத்தி பண்ணியிமிருக்கிறேன்.

இரண்டாவது அறிமுகம் ஒரு ஆண்.அதே கல்லூரியில் இரண்டாமாண்டின் போது. ஓரளவுக்கு ஓரினச் சேர்க்கையாளர்களைப் பற்றி, அவர்கள் எதிர் நோக்கும் குழப்பங்கள் பிரச்சனைகள் பற்றி தெளிவு கிடைத்தது இவனது அறிமுகத்தினால் என்று சொல்லலாம். கொஞ்சம் அதிகப்படியான பெண்மையுடன் கூடிய பாவனை. உடல்வாகும் அப்படியே.. வளர்த்துக் கொண்டிருக்கும் தலைமயிர். Robert என்ற பெயருடையவன். நகம் வளர்த்து தெளிந்த நகப்பூச்சும் பூசியிருப்பான். முற்போக்குச் சிந்தனைகளுடையவன் என்று சொல்லலாம். இதே வகுப்பில் இருந்த சிலருக்கு இவன் அவர்களுடைய குழுவில் இடம் பெற்றது பிடிக்காமல் ஆசிரியரிடம் போய் இவனை குழுமாற்றம் செய்த "பெருமை" உண்டு. எங்கள் குழுவில் இவன் மட்டும்தான் ஆண். பெண்ணாக மாறப் போகிறேன் என்று சொல்லிக் கொண்டேயிருப்பான். நாங்களும் அவனுடம் இருந்து பெண்ணாக இருப்பதன் நன்மை தீமைகளை அலசி ஆராய்வோம். சிறுவயதிலிருந்தே தான் தனிமையாக உணர்ந்ததாகச் சொல்வான். Princess என்பதே பள்ளியில் அவனது பட்டப்பெயராக இருந்திருக்கிறது.

ஒரு நாள் வந்தான்..வாகன ஒட்டுநர் அனுமதிப்பத்திரத்தைக் காட்டினான். அதில் "Sarah" என்று பெயர் மாற்றப்பட்டிருந்தது. சட்டத்தின் முன் தான் ஒரு பெண் என்பதை நிலைநிறுத்தும் முயற்சியின் பலன் அது என்பதை தெளிவாக விளங்கப்படுத்தினான். கல்லூரிக்கும் தேவையான அத்தாட்சிகளைக் கொண்டுவந்து சேராவாக மாறிவிட்டான். தொடர்ந்த வாரத்தில் இதுவரை ஆண்களின் ஆடையில் வலம் வந்த சேரா முதன் முதலாக ஒரு நீண்ட பாவாடையும் ஒரு வடிவான் மேற்சட்டையும் அணிந்து வந்து, வகுப்பில் சலசலப்பை ஏற்படுத்தினாள். கிசுகிசுப்பான பேச்சுகளும் நமுட்டுச் சிரிப்புகளும் நிறைந்த அந்தக்கணத்து வகுப்பை போன்று நாராசமானதாக வேறொன்றும் அவளுக்கு இருந்திராது என்பது திண்ணம். எங்களுக்கு, அதாவது குழுவிலிருந்த பெண்களுக்கு சேராவை பெண்ணாய் பார்ப்பதில் பிரச்சனை இருக்கவில்லை.

இரண்டு மூன்று மாதங்கள் சென்றிருக்கும், வகுப்பிலே ஆசிரியர் இல்லாத சமயம் பார்த்து தீவிர "ஹோமோஃபோபிக்" ஒருவனுக்கும் இவனுக்கும் தர்க்கமேற்பட்டது.

"நீயெல்லாம் கடவுளுக்கு எதிரானாவன்"
"எதனை ஆதாரமாக வைத்து இப்படிச் சொல்கிறாய்"
"பைபிளில் ஓரினச் சேர்க்கையாளர்கள் பாவிகள், தண்டிக்கப்படுவார்கள் என்றெல்லாம் சொல்லியிருக்கிறது"
"அதற்கு நான் என்ன செய்யட்டும்..நான் கடவுள் நம்பிக்கை இல்லாதவன்"
"அஹா! உன் செய்கைகளை ஆமோதிக்கும் கடவுளர் யாருமில்லை, அதனால் நீ கடவுள் பக்தியில்லை எனச் சொல்கிறாய்"
"என் காதலன் கத்தோலிக்கன்.அதற்கு என்ன சொல்கிறாய்"
"நரகத்திற்குப் போவான்"....

இப்படியே தொடர்ந்து பல அனாவசிய கோணங்களையும் தொட்ட அந்த விவாதம் கடைசியில் மற்றவன் "உன்னுடன் ஒரு அறையில் இருப்பதே என் மேல் ஏதோ ஊருவது போலுள்ளது" என்று சொல்லி வெளியேறியதில் முடிவுற்றது. அன்றைக்குத்தான் எனக்கு உறைத்தது, இப்படியும் மடத்தனமான ஆட்கள் இருக்கிறார்களே என்று. இவனும் சக மனிதன் தானே. உனக்கும் இவனுக்கும் செல்லப்பிராணியின் தெரிவில் வித்தியாசமிருக்கலாம்..உனக்கு நாயும் அவனுக்கு பூனையும் பிடிக்கலாம், அதற்காக தர்க்கம் செய்து,கீழ்த்தரமாக நடந்து கொள்வாயா?ஒருவனது தனிப்பட்ட விடயமான பாலியல் தெரிவு மட்டும் ஏன் இவ்வளவு விமர்சனத்திற்குள்ளாக வேண்டும்?

தப்பித் தவறி பழைய ஞாபகத்தில் Rob என்று கூப்பிட்டு நாக்கை கடித்து Sarah என்று நான் மாற்றியிருக்கிறேன்.ஒன்றும் பேசாது, அது பரவாயில்லை என்று சொல்லி, வேண்டுமென்று செய்யப்பட்ட தவறல்ல என்பதைப் புரிந்து கொண்டவள்.

ஆனாலும் அவனது "அவள்" மாற்றம், சுற்றியிருந்த எல்லோராலும் ஏற்றுக் கொள்ளப்பட்ட ஒன்றாக இருக்கவில்லை. எதிர்ப்பாலர்மேல் ஈர்ப்பு இருப்பதையே நியதி என்று கண்டும் கேட்டும் வளர்ந்தோருக்கு இம்மாதிரியான பாலியல் தெரிவுகள் அதிர்ச்சியளிக்கும். ஒரு நாளும் காணாத ஒன்று, வழமைக்கு மாறான ஒன்றாக ஒருவருக்கு தோன்றுவது, இன்னொருவருக்கு மிகச் சாதாரணமான ஒன்றாக இருக்கும். ஆணொருவருக்கு பெண்ணில் ஈர்ப்பு வருகிறது. ஒரு ஆண் தன்னினச் சேர்க்கையாளருக்கு இது நினைத்துக் கூடப் பார்க்க முடியாத ஒன்றாக இருக்கும். அடிப்படை வித்தியாசங்கள் தான் மனிதர்களை ஈர்க்கின்றன, வேறுபடுத்துகின்றன. இயல்பாகவே இருக்கும் வித்தியாசங்கள் போன்று ஒருவர் செய்யும் தெரிவுகளும் அவரை சமூகத்தில் அடையாளம் காட்டும். ஆனால் துரதிஸ்டவசமாக சமூகத்தின் அங்கத்தவர் என்ற முறையில், சக மனிதப்பிறவி என்னும் அடிப்படையில் தன்னினச் சேர்க்கையாளர்கள் பெரும்பாலானோரால் பார்க்கப்படுவதில்லை. அந்நியப்படுத்தப்பட்டு, அருவருக்கப்படும் நிலையே காணப்படுகிறது.

செய்வதற்கு உரிமையில்லாத செயலான பிறரின் அந்தரங்கத்தினுள் மூக்கை நுழைப்பதும், அதன் மீதான விமர்சனமும் தேவையற்றன. தெரிவுகள் தனிப்பட்டவை, அவற்றில் தலையிடுவதோ, விமர்சிப்பதோ நாகரிகமல்ல. அப்படியே விமர்சிக்கத்தான் வேண்டும், அதுதான் வாழ்வினைச் செலுத்துகிறது என்று நினைத்தால் அதை அழுக்கான அந்தரங்கங்களுக்குள் புதைத்துக் கொள்வது புத்தியான செயல்.

7 படகுகள் :

ஒரு பொடிச்சி February 27, 2005 4:51 am  

உங்களது பதிவு பிடித்திருக்கிறது.
நேரில் கண்ட/அனுபவரீதியாக எழுதுவது இன்னும் இயல்பாபக இருக்கிறது.

Thangamani February 27, 2005 7:36 am  

நல்ல பதிவு. நன்றி!

-/பெயரிலி. February 27, 2005 8:06 am  

நடைமுறையான கருத்தைச் சொல்லியிருக்கின்றீர்கள். பயனுள்ள பதிவாக இருக்கிறது. நன்றி.

`மழை` ஷ்ரேயா(Shreya) February 27, 2005 9:40 am  

நீங்கள் ஆமோதிப்பது சந்தோசமாக இருக்கிறது. இங்கேயே பலருடன் இந்தமாதிரி கதைத்து "உனக்கென்ன விசரா / அவங்கள் தான் பைதியக்காரங்கள்-தலையில சுகமில்லாதவங்கள் என்றால் நீ ஏன் அவங்களூக்கு வக்காலத்து வாங்கிறாய் " என்றும் உச்ச கட்ட்மாக "உன்னுடைய fantacy இதுதானோ" என்றும் கேட்கப்பட்டிருக்கிறேன். த.சேர்க்கையாளர்களுக்குப் பரிந்து பேசும் எனக்கே இத்தனை கேள்விகள்.பலவேளைகளில் மனவருத்தத்துடன் ஆத்திரமும், பேசுபவர்களின் மடமையை நினைத்துச் சிரிப்பும் வரும். விளங்கப்படுத்த முடியாத என் இயலாமையையும் விளக்கத்தை ஏற்றுக் கொள்ள முடியாத அவர்களது பூட்டப்பட்ட மனதையும் நொந்து கொள்வேன்.

டிசே தமிழன் February 27, 2005 11:44 am  

நன்றாக எழுதியிருக்கின்றீர்கள் ஷ்ரேயா.
பொடிச்சி, நீங்கள், கறுப்பி என்று எல்லோரும் ஓரினச்சேர்க்கையாளர்களைப் பற்றி விரிவாக எழுதியிருப்பதும், அவர்கள் பற்றிய உங்களின் புரிதல்களைத் தெளிவாக முன்வைத்திருப்பதும் முக்கியமானது.
//செய்வதற்கு உரிமையில்லாத செயலான பிறரின் அந்தரங்கத்தினுள் மூக்கை நுழைப்பதும், அதன் மீதான விமர்சனமும் தேவையற்றன. தெரிவுகள் தனிப்பட்டவை, அவற்றில் தலையிடுவதோ, விமர்சிப்பதோ நாகரிகமல்ல.//
உண்மைதான்.

Narain February 27, 2005 3:28 pm  

உண்மையினை அழகாக எழுதியிருக்கிறீர்கள். பேன்டசி என்றும், கலாச்சார சீர்கேடு என்றும் சொல்பவர்கள் இருந்து கொண்டேதான் இருப்பார்கள். அவர்களைத் தாண்டி,எல்லோரையும் மனிதர்களாக பார்த்தல் மிக அவசியமென்று படுகிறது. பிறரின் அந்தரங்கத்துக்குள் நுழையும் அதிகாரம் யாரிடமுமில்லை, கடவுள், அரசாங்கம் என நிறுவப்பட்ட நிறுவனங்களையும் சேர்த்து. அவரவர்கான வாழ்வு, அவரவர் பார்வை வாயிலாகவே மனிதர்களை பார்த்தல் வேண்டும்.

நிற்க. ஆனால், இது பாலீர்ப்பு அல்லது நேர்மையான தற்சேர்க்கையாளர்களுக்கு மட்டுமே. அடுத்தவரின் அனுமதி இல்லாமல், ஒரு ஆணையோ, பெண்ணையோ தற்சேர்க்கைக்கு அழைத்தல், கட்டாயபடுத்துதல் வன்புணர்விற்கு சமம். எவ்வாறு, தற்சேர்க்கையாளர்களின் உரிமைக்கு குரல் கொடுக்கிறேனோ, அதே அளவில் அதிலிருக்கும் வன்முறையினையும் எதிர்க்கிறேன். இதை இங்கே பதிய காரணம், தற்சேர்க்கையாளர்களை ஆமோதிக்கும் எல்லோரிடமும் கேட்கப்படும் முட்டாள்தனமான கேள்விகள். "உன் மேல கைபோட்டியானா சும்மா இருப்பியா" "உன் அந்தரங்க விசயங்களை தொட்டுப்பார்க்க அனுமதிப்பாயா" என நீளும். உரிமையினை நிலைநிறுத்தும் அதே நேரத்தில் வன்முறையான உறவு எவ்விதமாக இருந்தாலும், அதனை தீவிரமாக எதிர்க்கிறேன்.

`மழை` ஷ்ரேயா(Shreya) February 28, 2005 8:46 am  

நன்றி டி சே, நரேன்.

தன்னினச்சேர்க்கையாளர்களுக்கு சார்பாக பேசும் எப்வரும் எதிர்நோக்கும் மூடத்தனமான கேள்விகள் தான் நீங்கள் குறிப்பிட்டிருப்பது. சார்பாக கதைப்பதாலேயே உங்களுக்கு ஒரு விடயத்தில் ஈடுபாடு இருக்கும், அச்செயலில் உங்களை ஈடுபடுத்த இடம் கொடுப்பீர்கள் என்பது விதண்டாவாதம். வல்லுறவு மீதான கருத்து மிகவும் சரியானது.பரஸ்பர சம்மதத்துடன் இடம்பெறாத வரை, சம்மதமில்லாமல் திணிக்கப்படும் எதுவும் வன்முறையே. இதை நானும் எதிர்க்கிறேன்.

பெட்டகம்